Айрим ҳудудлардаги кўп қаватли уйларда иссиқлик таъминоти сусайди

 

Республика бўйлаб электр таъминотида узилишлар ва газ босимининг пасайиб кетиши ортидан учта қозонхона вақтинча ўчирилди. Бу ҳақда Уй-жой коммунал хизмат кўрсатиш вазирлиги матбуот хизмати хабар бермоқда. 

 

Қайд этилишича, бугунги кунда вазирлик тизимидаги қозонхоналар жами 495 тани ташкил қилади. 492 таси мавжуд имкониятлардан фойдаланган ҳолда иш фаолиятини давом эттирмоқда. Тошкент, Хоразм ва Фарғона вилоятларида жойлашган 21 та қозонхонада газ босимининг меъёрида бўлмаганлиги боис истеъмолчилар белгиланган параметрлардан паст кўрсаткичда иссиқ сув ва иссиқлик энергияси билан таъминланишига сабаб бўлмоқда. Газ босими меъёрида бўлмаганлиги туфайли 3 та қозонхонани вақтинча ўчиришга тўғри келган.

 

Шунингдек,пойтахтда ҳам иссиқлик энергияси “Тошкент Иссиқлик маркази”, “Тошкент ИЕС” ва “Веолиа Энергй Ташкент” нинг маҳаллий қозонхоналарида табиий газдан фойдаланган ҳолда ишлаб чиқарилиши, Тошкентнинг Иссиқлик маркази-3, 5 ва 9-қозонхоналари фаолиятида ҳам юқоридаги ҳолат кузатилмоқда. Ушбу иссиқлик марказларидан Шайхонтоҳур, Чилонзор ва Учтепа туманлари аҳолиси ва ижтимоий обектларига иссиқлик энергияси етказиб берилади.

 

“Газ босимининг етарли эмаслиги қозонхоналарнинг автоматик тарзда ўчишига сабаб бўлади. Албатта, бу ҳолатда иссиқлик таъминоти учун масъул ташкилотлар вазиятни яхшилаш учун ўзаро ҳамкорликда кучайтирилган режимда ишламоқда. Мутахассислар муаммоли ҳудудларни аниқлаш учун жойларга бориб, иссиқлик энергиясини қайта тақсимлаш бўйича ишларни мувофиқлаштириб бормоқда”, – дейилади расмий хабарда.

 

Аввалроқ, блогер Азиза Қурбонова пойтахтнинг Учтепа тумани (кўплаб маҳаллалари) яна тушкунлик домида эканини айтиб, ижтимоий тармоқда пост қолдирганди: 

 

"Газ йўқ, электр токи йўқ. Трубалар музлаган. Уйлар совиган. Рутубатли уйда одамнинг ҳамма нарсадан энсаси қотиб кетади. Чой ичиш учун қора қумғон ҳам йўқ. Қора қумғон топиш керак. Қаерда сотади?!

Маҳалла келинлари ёзишяпти.

— Бир нарса қилинг?! Якшанбада ҳамма уйда, овқат қилиш керак, кир-чир, чўмилиш керак. Болалар шамоллайди…

Ҳай, мен нима қила оламан?

Фақат нолий оламан.

Мен фақат чой дамлайдиган жинман.

Ўшанда ҳам қора қумғон тополсам, албатта," — деган блогер.