“Politico” нашри Зеленскийни Европадаги энг нуфузли шахс деб эътироф этди
“Time” журнали кеча Украина раҳбарини "Йил одами" деб топганди.
“Politico” журнали Владимир Зеленскийни Европадаги энг нуфузли шахс деб топди. Шу муносабат билан берган баёнотида Украина етакчиси келаси йил тинчлик бўлишига умид билдирди.
“Мен украиналиклар келаси йилда ҳам энг нуфузли бўлишига ишонаман, лекин уруш эмас тинчлик даврида”, — деди Зеленский.
У “барқарорликни сақлашга ёрдам бераётган ва “миллионлаб одамларга бу даҳшатли вақтдан ўтишда ёрдам бераётган” Европадаги барча дўстларига миннатдорчилик билдирди.
Чоршанба куни Россия президенти Владимир Путин Москванинг Украинадаги ҳарбий ҳаракатлари “узоқ жараён”га айланиши мумкинлигини айтди, бироқ уларнинг якунланишининг аниқ санасини айтмади.
“Politico” Зеленскийни Европанинг энг нуфузли одами деб номлаш қарорини қуйидагича изоҳлайди: “Европа ўзгармоқда. Қитъа ўзининг стратегик муносабатларини қайта кўриб чиқмоқда, мудофаа масалаларига жиддийроқ ёндашмоқда, савдо сиёсатини, шунингдек, кенгайиш ва энергия хавфсизлиги соҳасидаги сиёсатларни қайта кўриб чиқмоқда”.
Эслатиб ўтамиз, Сешанба куни Зеленский "Time" журнали томонидан ҳам "Йил одами" деб топилганди.
