Евроиттифоқ Россияга қарши 9-санкция пакетини тақдим этди

 

Европа Иттифоқи Украинадаги уруш туфайли Москвага босимни кучайтиришга қаратилган 9-санкциялар пакетини ишлаб чиқди. Унинг  доирасида Россия амалдорлари ва ҳарбийларининг саёҳатларини тақиқлаш ҳамда активларини музлатиш мақсад қилинган. 

 

Таклифлар Европа Иттифоқининг ижроия органи – Еврокомиссия томонидан берилган. Унинг раиси Урсула фон дер Леен шундай деди:

 

"Биринчидан, биз санкциялар рўйхатига яна 200 га яқин жисмоний ва юридик шахсларни қўшишни таклиф қиламиз. Бунга Россия Қуролли Кучлари, алоҳида офицерлар ва мудофаа саноати корхоналари, шунингдек, Давлат Думаси депутатлари, Федерал Кенгаши, вазирлар, губернаторлар ва сиёсатчилар киради".

 

Пакет шунингдек, икки томонлама фойдаланиладиган дронлар ва уларнинг компонентларини етказиб бериш бўйича экспорт чекловларини ҳам ўз ичига олади.

 

Ушбу чора-тадбирлар кучга киришидан олдин Европа Иттифоқига аъзо барча 27 давлат томонидан муҳокама қилиниши ва маъқулланиши керак. Янги санкциялар РФ мудофаа саноати ва банкларига жиддий зарба беришга, шунингдек, Россияни учувчисиз учиш аппаратларидан маҳрум қилишга қаратилган.

 

Бундан ташқари, Еврокомиссия Европа Иттифоқи аъзоларига Москванинг энергетика ва тоғ-кон саноати соҳаларига қарши чоралар кўришни тавсия қилади, жумладан, тоғ-кон саноатига янги сармоя киритишга тақиқ қўйиш, шунингдек, рус телеканалларининг Европадаги намойишини тўхтатиш шулар жумласидандир.