Шольц: Россия ядро таҳдидларини тўхтатди
Германия канцлери бунга қайси омиллар туфайли эришилганини маълум қилди.
Россия ядро таҳдидини камайтирди. Бу ҳақда Германия канцлери Олаф Шольц маълум қилди.
"Уруш аввалгидек шафқатсиз давом этаётганини кўряпмиз. Аммо бир нарса ўзгарди: халқаро ҳамжамият "қизил чизиқ" деб айтганидан сўнг ядро қуролини қўллаш билан таҳдид қилиш тўхтади", — деган у Funke Media Group'га берган интервьюсида.
Канцлернинг қўшимча қилишича, ҳозирда энг устувор вазифа жанговар ҳаракатларнинг тўхтатилиши ва Россия қўшинларининг олиб чиқиб кетилиши ҳисобланади. Кейин эса Европа хавфсизлигини таъминлаш устида ишлаш керак.
"Албатта, биз Россия билан Европада қуролларни назорат қилиш масаласини муҳокама қилишга тайёрмиз. Биз буни урушгача ҳам таклиф қилгандик", — деган Шольц.
Бир неча кун олдин Владимир Путин ҳам ядро таҳдиди масаласини кўтарганди. Россия инсон ҳуқуқлари кенгаши аъзолари билан йиғилишда у бу каби таҳдидлар мавжудлигини айтганди.
