Сурия 4 кунлик иш ҳафтасига ўтди
Бунга мамлакатда кузатилаётган ёқилғи инқирози сабаб бўлган.
Сурияда вақтинчалик тўрт кунлик иш ҳафтаси жорий этилди. Бунга санкциялар фонида ёқилғи етишмаслиги сабаб бўлган.
Бу тартиб фақат давлат идораларига нисбатан тааллуқли. Сурияда одатда жума ва шанба расман дам олиш куни ҳисобланади.
Янги тартиб узлуксиз ишлаши керак бўлган ташкилотларга амал қилмайди. Шунингдек, университетларда машғулотлар бекор қилинган. Хусусан, Сурия ички савдо вазири Амр Салим новвойхона ва касалхоналар ёпилмаслигини айтган.
Мамлакат нефть вазири Бассам Тоаменинг сўзларига кўра, ёқилғи билан боғлиқ инқироз 50 кун олдин бошланган, аммо шу кунгача мавжуд захиралар билан бунинг олди олинган эди. Вазият нефть танкерларининг ўз вақтида етиб келмаслиги ортидан оғирлашган.
