Қашқадарёдаги туғуруқхонада «свет» ўчиб, чақалоқлар совуқда қолгани айтилди
Ҳолатга ССВ муносабат билдирди.
Ижтимоий тармоқларда Қашқадарё вилоятининг Кўкдала туманидаги шифохонада чақалоқлар музлаётгани ҳақида хабарлар тарқалди. Ҳолат юзасидан Соғлиқни сақлаш вазирлиги матбуот хизмати расмий муносабат билдирди.
Қайд этилишича, туман тиббиёт бирлашмасига қарашли Чияли бўлинмасида, яъни қишлоқ участка шифохонасида 2022 йил 11 декабрь куни соат 03:30 да электр энергиясида узилиш кузатилган. Аммо иссиқлик таъминотида узилиш бўлмаган.
Шифохонада 4 кун аввал жами 7 нафар аёл фарзандли бўлган, 11 декабрь соат 12:00 да уларнинг 6 нафарига уйга жавоб берилган. 1 нафар аёл чақалоғи билан Кўкдала тумани тиббиёт бирлашмаси шифохонасига кўчирилган. Ҳозирда она ва болаларнинг саломатлиги яхши, шифокорлар назоратига олинган.
Айни пайтда шифохонада электр таъминоти тикланиб, муассаса қўшимча электр генератори билан таъминланган.
