Россия ва Украина ўртасида Рождество сулҳи йўқ
Москва Киевдан бундай таклиф олса, кўриб чиқишга тайёр.
Россия ҳукумати Украинадан Рождество сулҳини ўрнатиш бўйича ҳеч қандай таклиф олгани йўқ. Бу ҳақда президент матбуот котиби Дмитрий Песков маълум қилди.
Унинг сўзларига кўра, ҳеч кимдан таклифлар келиб тушмаган ва бундай мавзу кун тартибида ҳам йўқ. Спикер Украинадан шундай таклиф келса, жавоб беришга тайёр эканини қўшимча қилган.
Песков, шунингдек, АҚШ Украинага Патриот зенит-ракета тизимларини етказиб беришга қарор қилгани ҳақидаги маълумотларга изоҳ берди.
“Бизнинг замонда ОАВ хабарлари ишончсиз нарса, шунинг учун биз расмий маълумотни кутамиз”, — деди у.
Аввалроқ Америка ОАВлари Пентагондаги манбаларига таяниб, Оқ уй Украинага Патриот тизимларини юборишга тайёргарликни якунлаётгани ҳақида хабар берганди.
