АИ-80 бензин ишлаб чиқариш ҳажми оширилди
Фарғона нефтни қайта ишлаш заводида ижтимоий ёнилғи ишлаб чиқариш 50 фоизга кўпайгани айтилмоқда.
Фарғона нефтни қайта ишлаш заводида қиш мавсуми бошланиши билан АИ-80 маркали бензин ишлаб чиқариш ҳажми 50 фоиздан кўпроққа оширилди. Бу ҳақда Энергетика вазирлиги матбуот хизмати хабар берди.
14 декабрь ҳолатига кўра корхонада кунига 1 250 тонна маҳсулот ишлаб чиқарилган. Бу кўрсаткич шу йилнинг январь-ноябрь ойларидаги 800 тоннани ташкил этган.
Қайд этилишича, заводнинг ишлаб чиқариш қувватларини мақсадли янгилаш ҳамда Saneg нефт-газ компанияси (2022 йил июнь ойидан бери ФНҚИЗга эгалик қилади) томонидан жалб қилинган инвестициялар туфайли қайта ишлаш ҳажмини оширишга эришилган.
Бундан ташқари, АИ-92 бензин ишлаб чиқариш ҳажми ҳам оширилган. Ҳозирда ҳар куни камида 500 тонна шу маркали маҳсулот савдоларга қўйилмоқда.
Корхона директори Ҳабиб Латиповнинг сўзларига кўра, бугунги кунда корхонанинг барча ресурслари аҳолини ҳамёнбоп ёқилғи, хусусан, бензин билан таъминлашга қаратилган.
“Яқинда акциз солиғининг бекор қилиниши бозорга сезиларли таъсир кўрсатди ва талаб ҳам сезиларли даражада ошди. Бироқ биз ишлаб чиқариш дастурини ундан олдин, ноябрь ойида корхонанинг иш ҳажмини мослаштириб, куз-қиш мавсумининг максимал даври яқинлигини англаган ҳолда ўзгартирган эдик”, - дейди корхона директори Ҳабиб Латипов.
