Эрдоған Путин ва Асад билан учрашиш ниятида
Туркия етакчиси РФ Президентига ушбу таклифни берган.
Туркия Президенти Ражаб Тоййиб Эрдоған Анқара, Москва ва Дамашқ ўртасида уч томонлама музокаралар ўтказишни таклиф қилди. Унинг сўзларига кўра, россиялик ҳамкасби Владимир Путин бу фикрни қўллаб-қувватлаган.
Жаноб Эрдоған Сурия масаласини журналистлар билан суҳбатда тилга олди. Анқаранинг эҳтимолий ҳарбий амалиёти тўғрисидаги саволга жавоб берар экан, Туркия етакчиси бу масалада Россия ва Сурия билан биргаликда ҳаракатларни амалга ошириш тарафдори эканини айтган.
“Путинга РФ, Туркия ва Сурия етакчилари учрашувини ўтказишни таклиф қилдим. У ушбу ташаббусни ижобий баҳолади. Бу музокаралар жараёнининг бошланишига туртки беради”, – деган Президент.
Шу билан бирга у уч томонлама учрашув олдидан махсус хизматлар ва мудофаа вазирлари музокараларини ўтказиш зарурлигини қайд этган.
