Ижтимоий тармоқ сиёсий майдон эмас—Эрдоған
Туркия раҳбари Илон Маск билан гаплашиб олмоқчи.
Туркия Президенти Ражаб Тоййиб Эрдоған Твиттернинг аввалги раҳбарияти билан боғлиқ муаммолардан сўнг тармоқнинг янги эгаси Илон Маск билан музокара ўтказишни истисно қилмади.
Эрдоғаннинг Twitter билан мумкин бўлган ҳаракатлари ҳақида сўраган мухбирга Туркия етакчиси қуйидагича жавоб қайтарган:
“Агар шундай бўладиган бўлса, биз Илон Маск билан ўтириб гаплашамиз. Ҳеч бўлмаганда телефон қўнғироғи қиламиз. Twitter ҳақида ҳам, космос ҳақида ҳам гаплашишимиз мумкин. Лекин мен аввал айтганимдек, ижтимоий тармоқ сиёсий майдон эмас. Биз ижтимоий тармоқлар туфайли сиёсат ёки дипломатияда муваффақиятга эришмадик. Сиёсат тўғридан-тўғри халқ билан ва халқ учун амалга оширилади. Агар сиз халқингиз билан самимий алоқада бўлсангиз, на Twitter, на бошқа кучлар бунга аралаша олмайди”, деди у.
Эслатиб ўтамиз, аввалроқ Эрдоғанни қўллаб-қувватловчи ҳештеглар блокланган ёки кун тартибидан олиб ташланган ҳолатлар мавжудлиги хабар қилинганди.
