Ўзбекистонда давлат бюджети харажатлар салкам 20 трлн сўмга ортиши мумкин
Ҳукуматнинг ЯИМ бўйича прогнозлари эълон қилинди.
Бугун, 19 декабрь куни Олий Мажлис биносида Қонунчилик палатасининг навбатдаги мажлиси бўлиб ўтмоқда. Мажлисда депутатлар дастлаб “2023 йил учун Ўзбекистон Республикасининг Давлат бюджети тўғрисида”ги қонун лойиҳасини кўриб чиқишмоқда.
Таъкидланишича, қонун лойиҳаси ва Бюджетномада ялпи ички маҳсулотнинг ўсиш сурати 5,3 фоиз миқдорда бўлиши назарда тутилмоқда. Хусусан, саноат ишлаб чиқариш ҳажми 5,1 фоиз, қурилиш 6,0 фоиз, қишлоқ хўжалиги 3,5 фоиз, хизматлар соҳаси 6,7 фоизга ортиши кутилмоқда. 2023 йилда мамлакатнинг ялпи ички маҳсулоти 1068,0 триллион сўмни, Давлат бюджети даромадлари 232,1 триллион сўм ёки ялпи ички маҳсулотга нисбатан 21,7 фоиз даражасида бўлиши кутилмоқда.
Шунингдек, Қонун лойиҳаси билан 2023 йилдан бошлаб консолидациялашган бюджет тақчиллигининг чекланган миқдори ялпи ички маҳсулотга нисбатан 3 фоиздан ошмаслиги белгиланмоқда.
Давлат бюджетининг харажатлари (давлат мақсадли жамғармаларига ажратиладиган трансфертлар билан бирга) 257,7 триллион сўмни, ялпи ички маҳсулотга нисбатан 24,1 фоизни ёки 2022 йил кутилаётган ижрога нисбатан 18,9 трлн сўмга ортиши прогноз қилинмоқда.
