Россия дронлари тонгда бутун Украинани безовта қилди
Мамлакатнинг қатор вилоятларида ҳаво ҳужумига қарши мудофаа тизимлари ишлаган. Учувчисиз қурилмаларнинг аксарияти уриб туширилгани айтилмоқда.
Душанба куни эрта тонгда Россия дронлари Украинанинг қатор шаҳарларига ҳужум уюштирди. Киев мэри Виталий Кличконинг сўзларига кўра, пойтахтнинг икки туманида портлаш содир бўлган.
Ҳозирча жароҳатланганлар ва ҳалок бўлганлар ҳақида маълумот йўқ.
Соат 6 га яқин ҳаво тревогаси тўхтатилган. Киевга жами 20 та дрон ҳужум қилган бўлса, уларнинг 15 таси уриб туширилган.
Украинанинг қатор шимолий вилоятларида, хусусан, Черкасс, Харьков, Полтава ва Черниговда ҳаво ҳужумига қарши мудофаа тизимлари ишлаган.
Тасдиқланмаган маълумотларга кўра, Россия “Антонов” авиация заводига ҳам зарба берган.
