Андижонда 7 нафар қиз кўчада жанжаллашди
Ҳолат бўйича вилоят ИИБ маълумот берди.
Ижтимоий тармоқларда Андижон вилоятининг Пахтаобод туманида қизлар ўртасида жанжал юз берганлиги акс этган видео тарқалди. Ҳолат юзасидан вилоят ИИБ ахборот хизмати маълумот берди.
Ҳолат жорий йилнинг 7 декабрь куни соат 13:00 ларда Пахтаобод тумани “Муаззимбой” МФЙ ҳудудида жойлашган “Гумбаз” ошхонаси олдида содир бўлган. Шу туманинг “Қашқар” МФЙда яшовчи 3 нафар опа-сингиллар М.Н, М.И ва М.А.лар ҳамда уларга олдиндан таниш бўлган “Наврўз” МФЙда яшовчи фуқаролар С.С ва С.Ю.лар ўртасида жанжал юзага келган. Жанжалнинг келиб чиқишига М.Н томонидан С.Ю.га ҳақоратли сўзларнинг айтилгани сабаб бўлган.
Мазкур ҳолат юзасидан Пахтаобод тумани ИИБ ходимлари томонидан ушбу фуқароларга нисбатан Маъмурий жавобгарлик тўғрисидаги кодекснинг 183-моддаси (Майда безорилик) тартибида ҳужжатлар расмийлаштириб, чора кўришлик учун ЖИБ Пахтаобод тумани судига юборилган.
