Исроил разведкаси: Эрон Россияга қурол сотишни кенгайтирмоқчи
Ғарб ва Украина бир неча ойдан буён Москвани Теҳрондан дрон ва ракеталар сотиб олишда гумонлаб келади. РФ вакиллари буни рад этган бўлса-да, ноябрь ойида Эрон ТИВ Украинадаги можародан бир неча ой олдин Россияга учувчисиз қурилмаларни сотганини тан олганди.
Эрон Россияга қурол экспортини оширмоқчи. Бу ҳақда Исроил разведкаси “Моссад” директори Давид Барнеа маълум қилди.
“Биз Эрон ҳукумати сир сақламоқчи бўлган ҳаракатлар ҳақида огоҳлантирамиз — улар Россияга илғор қуролларни етказиб беришни оширмоқчи ва чуқурлаштирмоқчи. Шунингдек, улар уранни бойитиш лойиҳасини ... кенгайтирмоқчи”, – деган у.
Декабрь бошида АҚШ Теҳрон ва Москва ўртасида тўлақонли мудофаа ҳамкорлиги эҳтимолидан хавотир билдирганди. Ноябрда Эрон ТИВ Россияга ҳақиқатдан ҳам дронлар сотилгани, аммо бу Украина урушидан бир неча ой олдин амалга оширилганлигини тан олганди.
АҚШнинг БМТдаги доимий вакили Линда Томас-Гринфилд 22 декабрь куни Россияни Хавфсизлик кенгаши резолюцияларини бузган ҳолда КХДР ва Эрондан қурол сотиб олишда айблади.
