Оқ уй: "Путиннинг ошпази" Шойгу билан рақобатлашмоқда
"Вагнер" хусусий ҳарбий компаниясининг таъсири кучайиб бормоқда. Компания асосчиси Евгений Пригожин Украина можароси давомида энг таниқли шахслардан бирига айланди.
КХДР "Вагнер" хусусий ҳарбий компаниясига қурол етказиб берган ва янги келишувларга тайёрланмоқда. Бу ҳақда Оқ уй миллий хавфсизлик кенгашининг стратегик коммуникациялар бўйича координатори Жон Кирби маълум қилди.
"Биз учун бир нарса аниқ: "Вагнер" Россия мудофаа вазирлиги ва бошқа идоралар билан рақобатлаша оладиган йирик кучга айланмоқда", — деган амалдор.
Унинг сўзларига кўра, айрим ҳарбий қўмондонлар вақти-вақти билан мудофаа вазирлиги ва олий ҳарбий амалдорларни танқид қилмоқда, шунингдек, улар "Вагнер" қўмондонлиги остига ўтяпти. Буларнинг барчаси компания эгаси Евгений Пригожиннинг таъсири кучайишига сабаб бўлмоқда.
Кирбининг қайд этишича, ўтган ойда Шимолий Корея "Вагнер"чиларга илк қуроллар етказиб берди. Уларнинг орасида пиёдалар учун енгил ракеталар хам бор.
