Янги йил арчаси ўрнига соқол
Америкалик эркак соқоли ёрдамида ҳар йили рекорд ўрнатиб келади.
АҚШнинг Айдахо штатида яшовчи Жоэл Штрассер ҳар йил соқолини Янги йил учун безаб рекорд ўрнатиб келади.
2019 йилда у соқолига 302 та ўйинчоқ илиб рекорд ўрнатган. 2020 йилда безаклар сони 542 тага етказилган. 2021 йилда эса Штрассер соқолига 681 та шар илган.
Бу йил ҳам анъанага содиқ қолган ҳолда у ўз рекордини янгилади. Бу сафар у Гиннеснинг рекордлар китобига кириш учун 710 та ўйинчоқни соқолига илди.
Штрассер олдинги йилларда тизимсиз ҳаракат қилгани учун камроқ ўйинчоқларни сиғдирганини айтади. Жоэл бу ўйинчоқларни соқолига сиғдириш учун 2,5 соат вақт сарфлаган. Ўйинчоқларнинг умумий вазни қарийб 2 килограммни ташкил қилади.
