Тошкентда йўловчи билан қўпол гаплашган автобус ҳайдовчиси ишдан олинди
Ҳолатга “Тошшаҳартрансхизмат” изоҳ берди.
Ижтимоий тармоқларда Тошкент шаҳрида электробусни бошқариб кетаётган ҳайдовчи йўловчилар билан қўпол муомалада бўлгани акс этган видео тарқалди. Ҳолат юзасидан “Тошшаҳартрансхизмат” АЖ ахборот хизмати расмий муносабат билдирди.
Қайд этилишича, мазкур ҳолат “Тошшаҳартрансхизмат” АЖнинг “1-автобус саройи” филиали тасарруфидаги 81-сонли автобус йўналиши ҳайдовчиси Б.С томонидан содир этилган.
Йўловчига нисбатан муомала маданиятига риоя қилмаганлиги ва ички тартиб-қоидаларини бузганлиги учун ҳайдовчига нисбатан “1-автобус саройи” филиали раҳбарияти томонидан қатъий чора кўрилиб, ҳайдовчи Б.С билан тузилган меҳнат шартномаси бекор қилинган.
“Барча ҳайдовчилар билан йўловчиларни хавфсиз ташиш ва уларни ўз манзиларига соғ-омон етказиб қўйиш энг олий мақсадимиз эканлиги, йўловчилар билан хушмуомалада бўлишлик, хизмат кўрсатиш маданиятини ошириш юзасидан яна бир бор тушунтириш ишлари олиб борилиб, ҳайдовчилар устидан назорат кучайтирилди”, — дейилади хабарда.
