Эрон дронлари билан мақтанди
Қуролли кучлар бош штаби бошлиғига кўра, эронликлар фақатгина ички ресурсларга таяниб учувчисиз қурилмалар ярата олган.
Эрон учувчисиз қурилмалари аниқлиги ва жанговар вазифаларни сифатли бажариши бўйича дунёда биринчи ўринда туради. Бу ҳақда мамлакат қуролли кучлари бош штаби бошлиғи генерал-майор Муҳаммад Ҳусайн Багери маълум қилди.
"Бизнинг учувчисиз қурилмаларимиз тизими аниқлилиги, хизмат муддати ва жанговар вазифалар бажариши жиҳатидан энг юқори ўринда туради. Республика қуролли кучлари учувчисиз учоқларни фақат ички ресурслар ва ўз тажрибасига таяниб ривожлантира олди", — деган генерал.
Шунингдек, Багери Россиянинг Украинада Эрон дронларидан фойдаланаётгани бўйича Ғарб даъволарини психологик урушнинг бир қисми деб атаган.
22 декабрь куни Эрон ТИВ расмий вакили Носир Канани Владимир Зеленскийнинг АҚШ Конгрессидаги нутқида Эрон хақидаги фикрларини қоралади. Унинг сўзларига кўра, Теҳрон низо томонларининг ҳеч бирига ҳарбий техника етказиб бермаган.
