Фарғонада Cobalt ҳайдовчиси ҳарбий хизматчини қасддан уриб юборди
У ҳарбийларнинг тўхташ ишорасига бўйсунмаган.
Ижтимоий тармоқларда Фарғона вилоятида номаълум шахс ҳарбий хизматчини автомашинада уриб юборгани акс этган видео тарқалди. Ҳолатга вилоят прокуратураси расмий муносабат билдирди.
Маълум бўлишича, И.М. Cobalt русумли автомашинасида “Тоштепа” кўчасида жойлашган чегара қўриқлаш постига яқинлашганда ушбу постда хизмат олиб бораётган муддатли харбий хизматчи Д.Ў.нинг тўхташ ҳақидаги ишорасига бўйсунмасдан, ўтиб кетган. Сўнгра Д.Ў. дарҳол рация алоқа воситаси орқали ўзидан 200 метр узоқликда хизмат вазифасини олиб бораётган ҳарбий хизматчи оддий аскар А.Т. Cobalt автомашинаси унинг қонуний талабига бўйсунмасдан чегара постини бузиб ўтганлиги ҳақида хабар берган.
Оддий аскар А.Т. эса ушбу транспорт воситасини тўхтатиш учун унга тўхташ ишорасини берган. И.М. ҳарбий хизматчи А.Т.нинг қандай шаклда бўлмасин ўзининг хизмат вазифасини бажаришдан воз кечишга мажбур қилиш мақсадида унга қараб ҳаракатланиб борган ва машинанинг олд қисми билан уни қасддан уриб юборган. Шундан сўнг у ҳодиса жойидан қочиб яширинган.
Оддий аскар А.Т. олган тан жароҳатлари билан шифохонага ётқизилган.
Мазкур ҳолат юзасидан Жиноят кодексининг 219-моддаси 2-қисми билан жиноят иши қўзғатилиб, И.М.га нисбатан “қамоққа олиш” эҳтиёт чораси қўлланган. Ҳозирда дастлабки тергов ҳаракатлари давом эттирилмоқда.
