Ҳамид Карзай Афғонистондаги вазиятда АҚШни айблади
Мамлакат собиқ президенти хатосини кеч тушунганини тан олди.
Афғонистоннинг собиқ президенти Ҳамид Карзай мамлакатда содир bo‘lgan воқеаларда АҚШ айбдор эканини айтди. Бу ҳақда “Washington Post” нашри ёзмоқда.
“Афғонистондаги уруш бизнинг урушимиз эмас эди. Мен афғон шаҳарлари va уйларига қарши урушда АҚШнинг шериги бўлмаганман. ‘Терроризм устидан ғалабаʼ шиори остида олиб борилаётган уруш аслида одамларга қарши эканлигини англаганимдан кейин мен ўзгардим”, — деди у газетага берган интервьюсида.
Карзайнинг қўшимча қилишича, айнан шу сабабдан у «Толибон» ҳукуматини «биродарлар» деб атаган. Ваҳоланки, газета қайд этганидек, толиблар ҳамиша Карзайни душман сифатида кўрган.
Собиқ президентга кўра, агар унинг вориси Ашраф Ғани мамлакатни тарк этмаганида Афғонистон парчаланмаган бўлиши мумкин эди.
“Давлат қуламаган бўларди. Ғанининг кетиши ҳамма нарсанинг тугаши бўлди”, —деган у.
