Тошкентда 16 дақиқада келиши керак бўлган автобус йўловчиларни соатлаб куттирмоқда
Ҳолат юзасидан расмийлар тушунтириш берди.
Ижтимоий тармоқларда Тошкент шаҳрининг Қўйлиқ деҳқон бозори–Бошлиқ мавзеси йўналишида ҳаракатланадиган 12-сонли автобус йўловчиларни соатлаб куттираётгани ҳақида мурожаат эълон қилинди. Ҳолатга «Тошшаҳартрансхизмат» АЖ расмий муносабат билдирди.
Қайд этилишича, жамиятнинг “1-Автобус саройи” филиалига бириктирилган 12-сонли Қўйлиқ деҳқон бозори–Бошлиқ мавзеси автобус йўналишида иш кунлари 8 та, шанба ва якшанба кунлари 6 та MAN A22 ва Mersedes Benz LF русумли автобуслар ишга чиқарилади ва 16 дақиқа вақт оралиғида йўналишда транспорт қатновини ташкил этилиши белгиланган.
Бугун, 27 декабрь куни 12-сонли йўналишга белгиланган жадвал асосида 6 та автобуслар ишга чиқарилган бўлиб, Яшнобод тумани «Уйсозлар» кўчасида асфальт ётқизиш ишлари олиб борилаётгани сабабли мазкур кўча икки тарафлама ёпилган ва автобус ҳаракати айланма кўчалардан ташкил этилган. Шу билан бирга, Қўйлиқ деҳқон бозори қаршисида кўприк қуриш ишлари олиб борилаётгани муносабати билан ушбу кўчада катта тирбандликлар ҳам юзага келган. Шу сабабдан йўналишда автобуслар қатнов оралиқ вақти узайиб кетган.
“Бугунги кунда мазкур 12-сонли автобус йўналишида хизмат кўрсатувчи автобуслардаги техник носозликларни бартараф этиш, йўналишга керакли миқдорда автобусларни ишга чиқариш чоралари кўрилганлигини маълум қиламиз”, — дейилади хабарда.
