Туркия Қора денгизда янги газ конини топди
Бу ҳақда Эрдоған Вазирлар Маҳкамаси йиғилишида айтиб ўтди.
Туркия Президенти Режеп Таййип Эрдоған душанба куни Вазирлар Маҳкамаси йиғилишида Қора денгиздаги Туркия ҳудудий сувларидаги табиий газ захиралари 710 миллиард куб метргача кўпайганини маълум қилди.
«Фотиҳ» бурғулаш кемамиз сув остида 3023 метр чуқурликда 58 миллиард куб метр газ топди. Шундай қилиб, янги қудуқ билан биргаликда газ конлари заҳиралари 170 миллиард куб метрга ошиб, 710 миллиард куб метрга етди. Халқаро бозорларда улар 1 триллион долларга баҳоланмоқда», — деди Эрдоған.
Қора денгиздаги энг катта кон Сакарья бўлиб, унинг заҳиралари 400 миллиард куб метрдан ошади.
Шунингдек, Қора денгиздаги Сакарья конидан газ 2023 йилнинг 1-чорагидаёқ Туркиядаги истеъмолчиларга оқиб кела бошлайди. Бу ҳақда Президент Режеп Таййип Эрдоған кондан табиий газ етказиб бериш учун денгизга биринчи қувурни ишга тушириш маросимида айтиб ўтди. Биринчи босқичда кунига 10 миллион куб метрга яқин газ қазиб олинади.
Президент Туркия 2026 йилгача Сакарья конида табиий газ ишлаб чиқаришнинг максимал даражасига етишни режалаштираётганини қайд этди.
