Бухорода кўп қаватли уй қулаб тушгани айтилди
Ҳолат юзасидан расмийлар изоҳ берди.
Бухоро шаҳрининг Ибн Сино ёқасидаги кўп қаватли қурилиши тугалланмаган бинонинг 7-қаватидаги бетон плиталарнинг қулаб тушди. Ҳолат бўйича Фавқулодда вазиятлар вазирлиги маълумот берди.
Ҳодиса жорий йилнинг 27 декабрь куни соат 22:55 ларда юз берган. Ҳолат юзасидан зудлик билан Бухоро шаҳар ҳокими томонидан махсус ишчи гуруҳ тузилиб, унинг таркибига ФВБ, ИИБ, прокуратура, қурилиш инспекцияси ва бошқа тегишли ташкилотлар ходимлари жалб этилган.
Маълум бўлишича, бино бешинчи қаватга қадар пишиқ ғишт, олтинчи ва еттинчи қаватлари газоблок териш йўли билан қурилган. Еттинчи қават том ёпмаси бетон плиталари остида бўлган темир бетон белгиланган мустаҳкамликка эга бўлмаган тўсин (ригелга) ортиқча юкланишни берилиши сабабли рама конструкциянинг тўсин (ригел) қисмида бузилиш юзага келган.
Бинонинг асосий қисми, олтинчи қават темир бетон региллари ва бетон плиталар мустаҳкамлик даражасини йўқотмаган, шу вақтнинг ўзида қурувчи томонидан эгилган бетон плиталар хавфсиз жойга туширилиб, хавф бартараф этилган.
Ҳодиса содир бўлган вақтда бинода қурувчилар бўлмаган. Тан жароҳати олган ва ҳалок бўлганлар йўқ. Ҳозирда ушбу ҳолат юзасидан вилоят ИИБ тезкор тергов гуруҳи томонидан суриштирув ишлари олиб борилмоқда.
