Оҳангарондаги тўйда келин-куёвнинг дўстлари жанжаллашди
Ҳозирда улар жиноят ишига жалб этилган.
Ижтимоий тармоқда Тошкент вилоятининг Оҳангарон туманидаги автомобилларга газ қуйиш шохобчасида фуқаролар ўртасида жанжал келиб чиққани акс этган видео тарқалди. Ҳолатга вилоят ИИББ ахборот хизмати изоҳ берди.
Маълум қилинишича, воқеа автомобилларга газ қуйиш жараёни ёки у ерда навбат талашган ҳайдовчилар билан боғлиқ эмас. Ҳолат Оҳангарон тумани “Шодмалик” маҳалласида ўтказилган тўй маросимида содир бўлиб, хонадонга меҳмон сифатида келган куёвнинг жўралари ва келиннинг синфдош дўстлари тадбирда ўзаро тортишиб қолган.
Шундан сўнг улар тўй бўлаётган хонадон яқинида жойлашган, ҳозирги кунда таъмирлаш ишлари сабаб иш фаолиятида бўлмаган газ қуйиш шохобчаси ҳудудига ўтиб, бир-бирлари билан уришиб, жанжаллашган.
Ҳозирда жанжалда иштирок этганларнинг барчаси ўрнатилган тартибда жиноят ишига жалб этилиб, туман ички ишлар бўлими томонидан Жиноят кодексининг 277-моддаси 2-қисми «б» банди билан жиноят иши қўзғатилган. Тергов ҳаракатлари олиб борилмоқда.
