Президент ҳузурида Қонунчилик ва ҳуқуқий сиёсат институти ташкил этилди
Институт президентнинг ҳуқуқий сиёсатни шакиллантириш ва амалга ошириш бўйича илмий, ахборот таҳлилий жиҳатдан қўллаб қувватлайди.
Норматив-ҳуқуқий ҳужжатларни ишлаб чиқишда “ақлли тартибга солиш” лойиҳаси жорий этилади. Бу ҳақда президент томонидан имзоланган қарорда назарда тутилган.
Ҳужжат билан президент ҳузурида Қонунчилик ва ҳуқуқий сиёсат институти ташкил этилди.
Қарорга кўра, президентга ҳисобдор бўлган, давлат экспертлик илмий-тадқиқот муассасаси шаклидаги Қонунчилик ва ҳуқуқий сиёсат институти, жумладан:
Президентнинг ҳуқуқий сиёсатни шакллантириш ва амалга ошириш бўйича фаолиятини илмий, ахборот-таҳлилий жиҳатдан қўллаб-қувватлайди;
қонунчилик ҳужжатларининг тартибга солиш таъсирини баҳолашдан ўтказади ва амалга оширилишини мониторинг қилади, уларни такомиллаштириш бўйича таклифлар ишлаб чиқади.
Институтга қуйидаги соҳаларда амалий тадқиқотлар ўтказиш юклатилади:
маъмурий ислоҳотлар ўтказиш шароитида давлат бошқаруви тизимини такомиллаштиришнинг ҳуқуқий муаммоларини ўрганиш;
конституциявий ислоҳотларнинг сиёсий-ҳуқуқий устувор йўналишлари ва уни амалга ошириш механизмларини ишлаб чиқиш (давлат бошқаруви, фуқаролик жамиятини ривожлантириш);
норматив-ҳуқуқий ҳужжатларни ишлаб чиқиш ва амалга ошириш босқичида уларнинг тартибга солиш таъсирини баҳолаш тизимини мақбуллаштириш орқали “ақлли тартибга солиш” лойиҳасини жорий этиш;
коррупцияга қарши курашишнинг ташкилий-ҳуқуқий муаммоларини ўрганиш.
Ҳужжатга кўра, институт томонидан ўтказиладиган фундаментал ва амалий тадқиқотларни мувофиқлаштириш мақсадида Илмий-мувофиқлаштирувчи кенгаш тузилади.
