“Humo air” хусусийлаштирилди
Уни Швейцария компанияси сотиб олган.
“Humo air” авикомпаниясининг 100 фоиз давлат улуши сотилди. Бу ҳақда Давлат активларини бошқариш агентлиги хабар берди.
Тегишли хусусийлаштириш дастурларига мувофиқ, Швейцариянинг Valleyroad Capital S.A. билан “Humo air” МЧЖ устав капиталидаги 100 фоиз давлат улушини 27,2 млрд сўм тўлов ҳамда 2023-2026 йилларда компания авиапаркини ривожлантириш ва маҳаллий авиақатновларни ошириш мажбурияти билан сотиш юзасидан келишувга эришилган.
Мазкур битим доирасида Харидор қуйидаги мажбуриятларни ўз зиммасига олган:
—2026 йилгача компания томонидан 18 дона ҳаво кемаларини сотиб олиш, шу жумладан, 3 тасини 2023 йилнинг биринчи ярим йиллигида сотиб олиш ва парвозларни йўлга қўйиш;
—дастлабки босқичда ички рейслар сонини ҳафтасига 16 тагача ошириш, кейинги 5 йил давомида 60 тагача етказиш;
—махсус (қишлоқ ва халқ хўжалиги) авиациясининг хизмат кўрсатадиган самолётлари паркини босқичма-босқич янгилаш;
—авиакомпанияни бошқаришга авиация соҳасида кўп йиллик тажрибага эга малакали хорижий ва маҳаллий мутахассисларни жалб қилиш;
—Ўзбекистон Республикаси резидентлари орасидан авиакомпания ходимларининг камида 80 фоизини шакллантиришни таъминлаш;
—йўналишларда, шу жумладан, Ўзбекистон Республикасининг бошқа авиакомпаниялари резидентлари хизмат кўрсатмайдиган йўналишларда мақбул нархларда янги рейсларни ташкил этиш.
“Компанияни хорижий инвестор томонидан юқоридаги ривожлантириш шартлари билан сотиб олиниши фуқаро авиацияси соҳасига хусусий секторнинг кириб келиши орқали рақобат муҳитини ривожлантиришга, маҳаллий авиақатновларга бўлган талабни юмшатишга ва йўловчиларга мақбул нархларда авиаташув хизматларини кўрсатишга ўз ҳиссасини қўшади”, —дейилади хабарда.
Маълумот учун: Valleyroad Capital S.A. Швейцарияда 2006 йилда ташкил этилган бўлиб, Швейцарияда ва халқаро миқёсда йирик корхоналар ва тадбиркорларга хизмат кўрсатувчи мустақил корпоратив молиялаштириш компанияси ҳисобланади. Хорижий инвестор Ўзбекистондаги фаолиятини унинг 100 фоиз таъсисчилигидаги “Valleyroad Capital” МЧЖ томонидан амалга оширади.
