Андижонда сотувчи харидорнинг картасидан пул ўмарди
Ҳозирда унга нисбатан жиноят иши очилган.
Андижон вилоятининг Хўжаобод туманида сотувчи харидорнинг банк картасидан пул ўғирлади. Бу ҳақда вилоят ИИБ хабар берди.
Қайд этилишича, Булоқбоши туманида истиқомат қилувчи 1997 йилда туғилган С.Ж. ариза билан мурожаат қилиб, унинг банк картасидан номаълум шахс жами 2 451 000 сўм пулларни ечиб олганини билдириб, ушбу шахсни аниқлаб, қонуний чора кўришни сўраган.
Олиб борилган тезкор-қидирув тадбирлари натижасида фирибгарлик йўли билан пулларни ўзлаштирган шахс Андижон вилояти Хўжаобод туманида яшовчи 1991 йилда туғилган С.А. эканлиги аниқланган.
Дўкон сотувчиси бўлган С.А. унга ишониб берилган банк картасини ўзининг мобил қурилмасига ўтказган. Карта эгасидан “телефон қурилмам қуввати тугаб қолган, сизнинг қурилмангиздан фойдаланиб олай”, деб СМС-хабарномани қўлга киритиш орқали пулларни ўзлаштирган.
С.А.га нисбатан Жиноят Кодексининг 168-моддаси 3-қисми билан жиноят иши қўзғатилиб, тергов ҳаракатлари олиб борилмоқда.
