Хитойнинг янги ТИВ раҳбари АҚШ билан муносабатларни яхшилашга тайёрлигини билдирди
Цинь Ган 30 декабрда ташқи ишлар вазири деб эълон қилинганди.
Хитойнинг янги ташқи ишлар вазири Цинь Ган АҚШ давлат котиби Энтони Блинкен билан телефон орқали мулоқот қилди. Дипломат америкалик ҳамкасбига икки давлат муносабатлари нормаллашувига ҳисса қўшишга тайёрлигини билдирган.
“Мен сиз билан қалин ишчи алоқалар ўрнатишга, биргаликда ҳаракатлар билан давлатларимиз ўртасидаги муносабатларни яхшилаш ва ривожлантиришга тайёрман”, – деган у.
Хитой ташқи ишлар вазири Блинкенга Вашингтонда элчи бўлиб ишлаган даврида биргаликда ўтказган учрашувларини эслатиб ўтган.
30 декабрь куни Цинь Ган ХХРнинг янги ташқи ишлар вазири этиб тайинланди. 2013 йилдан буён ТИВ раҳбари бўлиб келган Ван И бу лавозимдан кетди.
Бунга қадар Цинь Ган Хитойнинг АҚШдаги элчиси лавозимида ишлаган.
