Расмий Пекин: Тайвань масаласи демократияга эмас, Хитой ҳудудий яхлитлигига дахлдор
ХХР Тайбэйга НАТО собиқ бош котибининг ташрифидан норозилик билдирди.
Тайвань масаласи инсон ҳуқуқлари ва демократия билан эмас, Хитой ҳудудий яхлитлиги билан боғлиқ. Бу ҳақда ХХР ташқи ишлар вазирлиги расмий вакили Мао Нин маълум қилди.
У НАТО собиқ бош котиби Андерс Фог Расмуссеннинг Тайбэйга ташрифини шундай изоҳлади. Альянснинг собиқ раҳбари 3 январь куни оролга келган ва маҳаллий администрация етакчиси Цай Инвэнь билан учрашган.
“Дунёда фақат ягона Хитой бор, Тайвань эса унинг ажралмас қисми ҳисобланади”, – деган Мао Нин.
Дипломат халқаро майдонда иккита Хитой тузиш ёки битта ХХР ва битта Тайвань тузиш ҳаракатлари муваффақиятсиз бўлишини таъкидлаган.
Маълумот ўрнида: Тайвань 1949 йилдан буён ўз администрацияси томонидан бошқарилади. Расмий Пекин ва жаҳон ҳамжамияти оролни ХХР таркибидаги ҳудуд деб ҳисоблайди.
