Эрдоған икки Владимир — Путин ва Зеленскийга сим қоқди
Туркия президенти икки давлатни яраштириш учун ҳаракат қилишда давом этмоқда.
Уруш масаласи бўйича тинчлик саъй-ҳаракатлари бир томонлама ўт очишни тўхтатиш билан қўллаб-қувватланиши керак. Бу ҳақда Туркия президенти Ражаб Тоййиб Эрдоған Кремль раҳбари Владимир Путин билан телефон суҳбатида маълум қилди.
Туркия раҳбарининг фикрича, тинчлик ўрнатиш учун “адолатли ечим қарашлари” керак.
Эрдоғон маъмурияти баёнотида, президентлар энергетика ва Қора денгиз дон йўлагини муҳокама қилгани ва Эрдоған Путинга Сурия чегара ҳудудини курд жангариларидан тозалаш бўйича аниқ қадамлар ҳақида гапиргани айтилган.
Аввал хабар қилинганидек, Анқара етакчиси Украина президенти Владимир Зеленский, шунингдек, Владимир Путин билан алоҳида музокаралар ўтказишни режалаштирган.
Шунингдек, Путин Эрдоған билан суҳбатда Москванинг мулоқот учун очиқлигини айтган. Аммо у Киевдан РФ талабларини бажаришни ва янги ҳудудий ўзгаришларни ҳисобга олишни талаб қилган.
Бундан ташқари, жаноб Эрдоған Владимир Зеленский билан ҳам қўнғироқлашди. У украиналик ҳамкасби билан ҳам тинчлик музокараларига қайтиш масаласини кўриб чиққан.
