Қозоғистондаги оммавий тартибсизликларга бутун 2021 йил давомида тайёргарлик кўрилгани айтилди
Ўтган йилнинг январида мамлакатни норозилик намойишлари қамраб олганди. Расмийлар бу ҳаракатларни давлат тўнтаришига уриниш сифатида баҳолаган.
Қозоғистондаги 2022 йил январь ойида бўлиб ўтган оммавий тартибсизликларга бутун 2021 йил давомида тайёргарлик кўрилган. Бу ҳақда республика бош прокурори Берик Асилов маълум қилди.
“Бутун 2021 йил давомида радикал ҳаракатларни амалга ошириш учун махфий тайёргарлик олиб борилган. Ташкилотчилар орасида уюшган жиноий гуруҳлар бўлган. Улар одамлар, қуроллар тўплаган, рациялар ва транспорт воситаларини сотиб олган. Тергов давомида куч ишлатар тизимнинг алоҳида вакиллари уларга ёрдам бергани аниқланди”, – деган бош прокурор парламентнинг қуйи палатасидаги чиқишида.
Жаноб Асилов январь воқеалари давлат тўнтаришини амалга оширишга уриниш бўлганини таъкидлаган. Шунингдек, Қозоғистон миллий хавфсизлик қўмитасининг собиқ раҳбари Карим Масимов ва унинг собиқ ўринбосари Ануар Садикуловларга қарши жиноят иши судга тақдим этилганини маълум қилган.
2022 йил 2январь куни Қозоғистонга суюлтирилган газ нархи оширилишига қарши оммавий норозилик намойишлари бошланди. Бир неча кун ичида иқтисодий талаблардан сиёсий талабларга ўтилди ва мамлакатда тартибсизликлар бошланди.
