Ўтган йили табиий офатлар қанча зарар келтирди?
Энг «қиммат» фалокат АҚШда содир бўлган.
2022 йилда табиий офатлардан келиб чиққан глобал молиявий йўқотишлар 270 миллиард долларни ташкил қилди. Бу ҳақда «Корреспондент» нашри ёзмоқда.
Қайд этилишича, ўтган йили сув тошқинлари, бўронлар, ўрмон ёнғинлари ва бошқа табиий офатлардан кўрилган зарар миқдори 2021 йилдан кам. Бир йил аввал зарар миқдори 320 миллиард доллар эди.
2022 йилнинг “энг қиммат” фалокати сентябрь ойи охирида АҚШнинг шарқий қирғоқларида содир бўлган «Ян» тўфони бўлди. Унинг зарари 100 миллиард долларга баҳоланган.
Ўтган йилги умумий йўқотишларнинг қарийб 120 миллиард доллари суғурталанган. Табиий офатлар суғурта компаниялари учун катта молиявий юк бўлиб қолмоқда.
Эслатиб ўтамиз, 2022 йил ноябрда бўлиб ўтган БМТнинг иқлим бўйича конференциясида иқлим ўзгариши билан боғлиқ зарарни қоплаш учун жамғарма ташкил этишга қарор қилинганди.
