Жонсон яна Украинага бормоқчи
Британия собиқ бош вазири ўтган йили уч марта Зеленский билан учрашганди.
Буюк Британия собиқ бош вазири Борис Жонсон тез орада Украинага ташриф буюриши мумкин. The Guardian маълумотларига кўра, бу орқали амалдаги ҳукумат раҳбари Риши Сунакнинг мавқеига жиддий путур етказилиши мумкин.
Консерватив партиянинг қатор юқори мартабали амалдорлари ташриф ортидан Зеленский ва Сунак муносабатлари совуқлашишидан хавотир билдирган.
"Низо ҳали-бери тугамайди. Борис Даунмпн-стритни тўлиқ қўллаб-қувватламаслигини билдириши керак эмас. Унинг ташрифи эса Лондон ва Киевнинг расмий каналлар орқали бераётган сигналларига халал бермаслиги лозим", — деган Британия парламенти аъзоси, консерватор Тобиас Эллвуд.
Украинадаги манбалар Жонсонда ҳақиқатдан ҳам ташриф бўйича режалар борлигини, аммо унинг аниқ санасини билмаслигини маълум қилган. Собиқ бош вазирнинг расмий вакили эса ушбу хабарларга изоҳ беришдан бош тортди.
Борис Жонсон ўтган йили, ҳукумат раҳбари бўлиб турганда Украинага уч марта ташриф буюрган. Амалдаги бош вазир Риши Сунак эса 2022 йил ноябрида Владимир Зеленский билан учрашганди.
