Тошкентдаги кўп қаватли уйларда иссиқ сув ҳарорати пасайтирилади
Шаҳар ҳокимлиги фуқаролардан энергия сарфини камайтиришни сўради.
Тошкентдаги кўп қаватли уйларда иссиқ сув ҳарорати вақтинча пасайтирилади. Бу ҳақда шаҳар ҳокимлиги маълум қилди.
Қайд этилишича, пойтахтда ҳаво ҳароратининг кескин пасайиши оқибатида иссиқлик станцияларига узатилаётган табиий газ босимининг пасайиб кетиши сабабли хонадонларга етказиб берилаётган иссиқ сув таъминотида ҳам, иситиш тизимида ҳам охирги кунларда ҳарорат сезиларли даражада пасайиб кетган.
Бунинг натижасида ўз хонадонларини иситиш мақсадида фуқаролар қўшимча электр мосламалардан фойдаланишга мажбур бўлмоқда.
Бу ўз навбатида трансформатор станциялари ва узатиш симларида нормадан ортиқча юкламани вужудга келтиряпти, бунинг оқибатида эса охирги кунларда трансформаторлар ва симларда портлаш, ёниб кетиш каби авариялар сони кунлик ўн баробаридан ошиб кетган.
Шунга кўра, электр тизимига юкламани пасайтириш, ҳамда марказлашган иссиқлик тизими (отопление)да ҳароратни кўтариш мақсадида, энг камида, уч кун давомида кўп қаватли уйларнинг иссиқ сув таъминотида ҳароратни вақтинча пасайтирилади. Бунда сувни иситишга сарфланаётган табиий газ иссиқлик тизими (отопление)га йўналтирилади.
“Вазиятни шаҳримиз фуқаролари тўғри баҳолашларига умид қиламиз ва келтирилган ноқулайликлар учун узр сўраймиз.
Сизлардан уйларингиздаги энг зарур хоналарни иситиш ва ёритишдан ташқари энергия сарфини имкон қадар камайтиришингизни илтимос қиламиз”, — дейилади хабарда.
