Суверенитетга таҳдид йўқ — Энергетика вазирлиги
Кеча “Газпром” билан имзоланган “йўл харита”сига расмий муносабат билдирилди.
Кеча Ўзбекистон “Газпром” билан энергетик ҳамкорлик бўйича “йўл харитаси”ни имзолаган эди. Бу ижтимоий тармоқларда кенг муҳокамаларга сабаб бўлди.
Келишув бўйича Энергетика вазирлиги 1 кун ўтиб муносабат билдирди.
“Жорий йил 24 январь куни Ўзбекистон Республикаси Энергетика вазирлиги ва «Газпром» компанияси ўртасида газ соҳасида ҳамкорлик бўйича музокаралар ўтказилди ва унда Россиядан Ўзбекистонга табиий газ етказиб беришнинг техник имкониятлари муҳокама қилинди.
Имзоланган “Йўл харита”га мувофиқ томонлар ўртасида тузилган Ишчи гуруҳ Қозоғистон ва Ўзбекистон ҳудудидан ўтувчи “Ўрта Осиё – Марказ” газ қувури орқали газ транзитини амалга ошириш учун зарур бўладиган техник чора-тадбирларни ва ўрганишни келишиб олинди.
Ишчи гуруҳ техник жиҳатдан барча ишларни якунлагандан сўнг, табиий газни етказиб бериш бўйича асосий шартларни муҳокама қилинади”, — дейилади вазирлик баёнотида.
Алоҳида қайд этилишича, олиб борилган музокаралар ҳамда “Йўл харитаси”да Ўзбекистон Республикасининг мавжуд газ транспорти тизимига эгалик ҳуқуқини тўлиқ сақлаган ҳолда ички бозорга табиий газ зарур миқдорларда етказиб бериш мақсад қилинган. Бунда газ транспорт тизими кимгадир берилиши ёки суверенитетимизга қандайдир таҳдид умуман йўқ.
“Келгусида ушбу йўналишдаги барча ишлар Ўзбекистон Республикасининг миллий манфаатларини тўлиқ ҳимоя қилган ҳолда амалга оширилиб, натижалари юзасидан доимий равишда жамоатчиликка маълум қилиб борилади”, — деб якунланган расмий муносабат.
