2025 йилгача дунёдаги илк 3D масжид қурилади
Масжид майдони 2000 квадрат метрни ташкил этади.
Дубайнинг Исломий Ишлар ва Хайрия Ишлари Бошқармаси дунёдаги илк 3D босма масжиднинг қурилишини эълон қилди. Маълум бўлишича, 2025 йилда Бур Дубай туманида қуриб битказилиши кутилаётган масжид майдони 2000 квадрат метрни ташкил қилади.
"3D босиб чиқариш технологиясидан фойдаланиш қурилиш материалларининг исроф бўлишини камайтиради. Бу атроф-муҳитга дўстона. Масжид доно раҳбариятимизнинг қарашларини ифодалайди. 3D босма масжид уни одатий йўл билан қуришдан 30 фоизга қимматроқ, чунки у бундай турдаги дунёдаги биринчи масжиддир. Биз ундан 30 йиллик қурилиш кафолатини кутяпмиз",- дея таъкидлаган IASAD муҳандислик бўлими директори Ал Шайбоний.
Қайд этилишича, масжид конструкциясини 3D босиб чиқаришнинг оъзи учун таҳминан 4 ой керак. Бунда соатига икки квадрат метр 3D босиб чиқарилиши учун учта ишчи робот принтер билан ишлайди. Масжиднинг 3D конструкцияси тайёр бўлгач, уни керакли нарсалар билан жиҳозлаш ва безак ишлари учун яна 12 ой керак бўлади.
