Сурхондарёда ишдан бўшаган ходим номига 305 млн иш ҳақи ёзилди
Ҳозирда ҳолат юзасидан жиноят иши очилган.
Сурхондарё вилояти патологиканатомия бюроси бош ҳисобчисининг талон-торожлиги фош бўлди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, департаментининг Сурхондарё вилоят бошқармаси томонидан ўтказилган терговга қадар текширувда вилоят Патологиканатомия бюроси бош ҳисобчиси И.М. 2019 йилнинг январь ойида ишдан бўшаб кетган Г.П.нинг номига 2019-2022 йиллар давомида иш ҳақи ҳисоблаб, жами 305,8 млн сўмни ўзлаштирганлиги аниқланиб, фуқаро Г.П.нинг номига очилган пластик карта ашёвий далил сифатида олинган.
Ҳозирда мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
