Еб тўймаган… Зеленский энди самолёт олишни истамоқда
Кеча Германия ва АҚШ Киевга танк етказиб беришга рози бўлганди.
Ғарб давлатлари Киевга танклар етказиб берилишини эълон қилгач, Украина президенти Владимир Зеленский улардан узоқ масофага учувчи ракеталар ва жанговар самолётлар ҳам олиши кераклигини айтди.
"Бугун мен НАТО бош котиби Йенс Столтенберг билан гаплашдим. Энди Украина учун узоқ масофага учувчи ракеталар ҳам етказиб бериш керак, бу муҳим - артиллерия соҳасида ҳамкорликни ҳам кенгайтиришимиз лозим", - деди у Телеграм каналида эълон қилинган видеомурожаатда.
Чоршанба куни АҚШ расмийлари Киевга 31 та M1 Abrams танкини топшириш ниятида эканлигини маълум қилди. Ўз навбатида, Германия ҳукумати Украинага Германия қуролли кучлари захирасидан 14 та "Leopard 2" танкини жўнатишини ва бошқа давлатларга реэкспорт қилиш учун рухсат беришини тасдиқлади.
Норвегия ва Словакия Мудофаа вазирлиги ҳам танкларни Украинага ўтказиш нияти борлигини маълум қилди. Аввалроқ Киевни танклар билан таъминлаш қарори Буюк Британия, Франция ва Польша расмийлари томонидан эълон қилинган эди.
