Bloomberg: Россия баҳорда йирик ҳужум бошлаши мумкин
Сўнгги вақтларда Украина ва унинг иттифоқчилари Москванинг янги ҳужум бошлаши мумкинлиги ҳақида тез-тез гапиришмоқда.
Владимир Путин Украинада навбатдаги йирик ҳужумни баҳорда бошлаши мумкин. Бу ҳақда Bloomberg агентлиги хабар берди.
Агентликнинг Кремлдаги манбаларга асосланиб берган хабарига кўра, РФ президенти армиянинг бир неча ойлик муваффақиятсизликлардан сўнг ташаббусни қайтара олишини кўрсатмоқчи. Бундан ташқари, ҳужум орқали Киев ва унинг иттифоқчиларига ярашув бошлаш бўйича босим ўтказиш ҳам мақсад қилинган бўлиши мумкин.
Агентлик манбалари ҳатто Путин ҳам қуролли кучларнинг заифлигини кўриб турганини қайд этган. Уларнинг фикрича, бир неча ойлик муваффақиятсиз ҳаракатлар Кремлда кўпчиликни вазиятни реал баҳолашга мажбур қилган.
Янги сафарбарлик тўлқини ҳам баҳорда бошланиши мумкин
“Путин ҳамон яна йирик кучлар ва кўплаб йўқотишлар унга ғалаба келтира олишига ишонмоқда”, – дейилади хабарда.
Нашр суҳбатдошлари РФда сафарбарликнинг янги тўлқини баҳорда бошланиши мумкинлигини иддао қилган.
Сўнгги вақтларда Украина ва унинг иттифоқчилари Россиянинг ҳужум бошлаши мумкинлиги ҳақида тез-тез гапирмоқда. Уларнинг фикрича, янги амалиёт Киев Ғарб танкларини олиб улгурмасдан бошланиши мумкин.
