"Бундай рақамлар ҳеч қачон бўлмаган" — Шавкат Мирзиёев

 

Президент Шавкат Мирзиёев Ўзбекистон-Қирғизистон ўртасида ўзаро товар айирбошлаш сўнгги йилларда 7 баробар ўсиб, 1,3 миллиард долларга етганини қайд этди.

 

«Икки томонлама муносабатлар жадал ривожланиб бораётганини алоҳида мамнуният билан қайд этамиз. Бизнинг алоқаларимиз тизимли ва, алоҳида таъкидлашни истардим, интенсив характерга эга бўлди. Бу ўзаро ҳамкорликни сезиларли даражада мустаҳкамлаш, ўсишнинг янги нуқталарини аниқлаш ва амалий ҳамкорликни кенгайтириш имконини берди.

Музокаралар якунланиб, чегаралар тўғрисидаги тарихий шартнома имзоланди, бу эса қардош халқларимиз томонидан катта қизиқиш билан кутиб олинди.

Ўзаро товар айирбошлаш сўнгги йилларда 7 баробар ўсиб, 1,3 миллиард долларга етди. Бундай рақамлар ҳеч қачон бўлмаган. Қирғизистонда саноат кооперацияси доирасида 300 дан ортиқ қўшма корхона ташкил этилиб, замонавий маиший техника, қурилиш материаллари, тиббиёт буюмлари ишлаб чиқариш йўлга қўйилди. Ўзбек-қирғиз тараққиёт режаси ишга туширилди ва ҳозирданоқ реал лойиҳаларни молиялаштирмоқда.

Бир кун аввал бизнес-форум муваффақиятли ўтказилди ва унда 1 миллиард 600 миллион долларлик фирма шартномалари тўплами имзоланди. Йирик минтақавий лойиҳалар – Қамбарота 1 ГЭСи ва Хитой-Қирғизистон-Ўзбекистон темир йўлини амалга ошириш бошланди. Улар биз учун ўзаро муносабатларнинг мутлақо янги уфқларини очади», — деди Шавкат Мирзиёев.