Вашингтон Москвага қарши санкцияларни юмшатишга тайёр
Бунинг учун Россия нима қилиши керак?
АҚШ маъмурияти Украина бўйича жиддий музокараларда Россияга қарши санкцияларни юмшатиш имкониятини кўриб чиқишга тайёр. Бу ҳақда Давлат котибининг сиёсий масалалар бўйича ўринбосари Виктория Нуланд маълум қилди.
“Россиянинг жиддий музокаралар олиб бориш ва ўз кучларини Украинадан олиб чиқиб кетиш ҳамда ҳудудни қайтариш тўғрисидаги қарорини мен, албатта, қўллаб-қувватлаган бўлардим”, — деди дипломат.
Кремлга кўра, ҳозир Украина билан музокаралар олиб бориш учун шарт-шароит йўқ. Шунингдек, у Вашингтоннинг Дума ва Федерация Кенгаши аъзоларига нисбатан чеклов чораларини қўллаш тўғрисидаги қарорлари аслида Россия-Америка парламентлараро мулоқотининг барбод бўлишига олиб келганини таъкидлади.
