Дрон нархи 1 доллар, аммо унга хизмат кўрсатиш 10 миллион
АҚШ компанияси Украинага ноодатий таклиф билан чиқди.
АҚШнинг General Atomics Aeronautical Systems Inc (GA-ASI) компанияси Украинадан икки дона MQ-9 Reaper дрони учун 1 доллар сўради. The Wall Street Journal газетасига кўра, эҳтимолий келишув Жозеф Байден администрацияси томонидан маъқулланиши кутилмоқда.
Нашр маълумотларига кўра, ўтган ҳафта Вашингтондаги Украина ҳарбий атташесига юқоридаги таклиф жўнатилган. Аммо дронларни жўнатиш 10 миллион долларга, уларга йиллик хизмат кўрсатиш 8 миллион долларга тушади. Келишув амалга ошган тақдирда компания учувчисиз қурилмаларни бошқаришнинг ерусти станциясини ҳам тақдим этади.
MQ-9 Reaper хусусий тартибда, АҚШ ҳукуматининг ёрдам тизимидан ташқарида етказиб берилади. Аммо у ҳар қандай ҳолатда Оқ уй томонидан маъқулланиши керак.
