Ангренда сохта пул тайёрловчилар ушланди
Тезкор тадбирда 4 киши қўлга олинган.
Тошкент вилоятининг Ангрен шаҳрида сохта пул тайёрлаб, уни сотувчи шахслар қўлга тушди. Бу ҳақда вилоят ИИББ ахборот хизмати хабар берди.
Қайд этилишича ўтказилган тезкор тадбирда 1976 йилда туғилган фуқаро 1,5 млн сўм қалбаки пулларни 400 минг сўмга сотаётган вақтида ушланган.
Шунингдек, ишга алоқадор бўлган яна 4 нафар (29–47 ёшли) шахслар процессуал тартибда қўлга олинган. Улардан 1,5 млн сўмга тенг бўлган қалбаки 100 минг сўмлик купюралар ва рангли принтер далилий ашё сифатида ҳужжатлаштирилиб олинган.
Аниқланишича, ушбу шахслар томонидан аввалроқ ҳам 5 млн сўмга тенг бўлган қалбаки пул купюралари чоп этилган.
Ҳозирда ҳолат юзасидан Ўзбекистон Республикаси Жиноят кодексининг 176-моддаси, 2-қисми билан жиноят иши қўзғатилиб, тергов ҳаракатлари олиб борилмоқда.
