Фарғонада автомобиль қатнов йўлини "ер ютди"
Носозлик сабаб ЙТҲ содир бўлди.
Ижтимоий тармоқларда Фарғонада йўлнинг қатнов қисми ўпирилиб тушгани акс этган сурат тарқалди. Ҳолат юзасидан Фарғона вилояти ИИБ ЙҲХБ изоҳ берди.
Аниқланишича, жорий йилнинг 1 февраль куни 4 К 923 Яйпан-Рапқон-Бешариқ-Чилмахрам автомобиль йўлининг 25-км.да ер ости сизот сувларининг йўл қопламаси остига тўпланганлиги натижасида, ўпирилиш содир бўлган.
Мазкур ҳолат шу куннинг ўзида керакли куч-воситалар ёрдамида бартараф этилиб, автомобиллар қатнови тикланган.
Йўлдаги носозлик туфайли содир бўлган йўл-транспорт ҳодисаси натижасида Nexia автомашинаси ҳайдовчиси дастлабки маълумотга кўра, енгил тан жароҳати олган.
Ҳозирда ушбу ҳолат юзасидан Бешариқ тумани ИИБ ЙҲХБ томонидан ўрганиш ишлари олиб борилмоқда.
