Ўзбекистондан Афғонистонга темир йўл қатнови қайта тикланди
Афғонистон темир йўллари бошқармаси раҳбари бошчилигидаги афғон делегацияси Ўзбекистонга келди.
Бугундан Ўзбекистондан Афғонистонга темир йўл қатнови қайта тикланди. Бу ҳақда "Ўзбекистон темир йўллари" хабар берди.
Термиз шаҳрида Афғонистон темир йўллари бошқармаси раҳбари Байтурраҳмон Шарофат бошчилигидаги афғон делегацияси билан учрашув ўтказилди.
Учрашув натижасида Афғонистон темир йўл бошқармаси ва “Sogdiana trans” ШК ўртасида “Ҳайратон-Мозори Шариф” темир йўлини эксплуатация қилишни келгусида давом эттириш бўйича, янги шартнома имзолашга келишилди.
Шу билан бирга томонларнинг келишувига кўра, Афғонистон томонига йўналтирилган вагонларни “Ўзбекистон темир йўллари”нинг “Sogdiana trans” ШК томонидан Ҳайратон станциясига етказиб бериш қайта тикланди.
Музокаралар якунида эришилган келишувлар бўйича баённома имзоланди.
Эслатиб ўтамиз, 1 февралдан Ўзбекистондан Афғонистонга темир йўл қатнови вақтинча тўхтатилган эди. Бунга Афғонистон темир йўл бошқармаси икки мамлакат ўртасидаги “ҳаракатлар режаси” бўйича келишилган чора-тадбирларни ўз вақтида амалга ошира олмагани сабаб бўлган.
