Фарғонада 4 қаватга мўлжалланган тураржой 7 қават қилиб қурилди

 

Ижтимоий тармоқда Фарғона шаҳрининг Регистон кўчасида жойлашган тураржой биноси режага кўра тўрт қават эмас, етти қават қилиб қурилаётгани ҳақида хабарлар тарқалди. Ҳолат юзасидан Қурилиш ва уй-жой коммунал хўжалиги вазирлиги расмий муносабат билдирди.

 

Маълум қилиничича, «Регистон» кўчасидаги бўш ер майдонида тўрт қаватли турар-жой биноси, автотураргоҳ, болалар майдончаси қуриш ҳамда туташ ҳудудни ободонлаштириш ва кўкаламзорлаштириш объекти 2018 йил 3 декабрь куни рўйхатдан ўтган ва қурилиш ишлари бошланган, объектда инспекция томонидан доимий назорат ишлари олиб борилган. 

 

Тураржой биносининг лойиҳа ҳужжатларида тўрт қават қуриш белгиланган, амалда эса етти қават қилиб қурилган. Ушбу объектнинг бешинчи, олтинчи, еттинчи қаватларини қуриш учун пастки қаватларни юк кўтариш қобилиятини ўрганиш бўйича МЧЖ томонидан тайёрланган техник хулосага асосан юқори қаватларни енгил қурилиш материалларидан бажаришга тавсия этилган. Лекин буюртмачи H.Latipov ва пудратчи “Икат Водий” МЧЖ томонидан ушбу хулосага асосан лойиҳа ҳужжатлари қайта тўлиқ ишлаб чиқилмаган, белгиланган тартибда экспертизадан ўтказилмаган ҳамда инспекцияга хабарнома юбориб рўйхатдан ўтмасдан қурилиш ишлари амалга оширилган.

 

Фарғона вилоят қурилиш соҳасида ҳудудий назорат инспекцияси томонидан объект қурилишини тўхтатиш тўғрисида 2022 йил 12 декабрда ёзма кўрсатма берилган. Шунингдек, аниқланган қонун бузилиш ҳолати юзасидан 2022 йил 26 декабрь куни маъмурий ҳуқуқбузарлик тўғрисида баённома расмийлаштирилиб, маъмурий судга юборилган. Бугунги кунда объектда қурилиш-монтаж ишлари тўхтатилган.