Тошкентда «новостройка» деворлари бўлиниб кетяптими?

 

Ижтимоий тармоқда Тошкент шаҳрининг Мирзо Улуғбек туманида янги қурилган кўп қаватли уйлар девори бир йилга етмасдан бўлиниб кетгани ҳақида хабар тарқалди. Ҳолат юзасидан Қурилиш ва уй-жой коммунал хўжалиги вазирлиги расмий муносабат билдирди.

 

Маълум қилинишича, Мирзо Улуғбек туманининг Мағрур кўчасидаги уй 2017 йилда  фуқаро Б.Зокиров  томонидан  ўзи ва оила аъзоларининг яшаши учун якка тартибдаги уй-жой сифатида қурилган ва фуқароларга алоҳида квартира сифатида ўзбошимчалик билан реконструкция қилинган ҳолда сотилган. Республика суд экспертиза марказининг хулосасида ушбу уйлар бир қанча низомлар ва сейсмик зонада қурилиш ўтказиш талабларига жавоб бермаслиги аниқланиб, ҳозирги кунда авария ҳолатида эканлиги аниқланган.

 

B.Zokirov ўз манфаатларини кўзлаган ҳолда фуқароларни ишончига кириб, якка тартибда фойдаланиш мақсадида қурилган тураржой биносини кўп квартирали уй-жой сифатида алдов йўли билан фуқароларга сотган. Б.З. ва унинг шерикларига нисбатан 2022 йил 14 майда Жиноят кодексининг тегишли моддалари билан айблов эълон қилиниб, “қамоққа олиш тарзидаги” эҳтиёт чораси қўлланган ва жиноят иши бўйича айблов хулосаси тасдиқланган.

 

Суднинг 2022 йил 1 июлдаги ҳукмига кўра, «Қуюн» МЧЖ раҳбари Б.Зокировга 8 йилу 2 ой муддатга озодликдан маҳрум қилиш жазоси тайинланган.

 

“Ҳозирги кунда фуқароларга етказилган зарарни қоплаш мақсадида суд органи томонидан компенсация пулини ундириш учун суд жараёнлари давом этмоқда”, — дейилади хабарда.