Европа давлатлари Украинанинг ўзида қурол ишлаб чиқариш учун “пойга” ўйнамоқда
Буюк Британия бу бўйича ҳаракатларни аллақачон бошлаб юборгани айтилмоқда.
Буюк Британия Украинада қурол ишлаб чиқаришни йўлга қўйиши мумкин. Бу ҳақда ўз манбаларига таяниб, The Telegraph газетаси хабар берди.
Бу бўйича Бирлашган Қироллик мудофаа саноати вакиллари Киев билан музокара ўтказган. Шунингдек, бошқа Европа давлатлари ҳам бевосита Украинанинг ўзида қурол ишлаб чиқариш вариантини кўриб чиқмоқда. Аммо Британия ишлаб чиқарувчилари “уларни француз ёки немис рақобатчилари ортда қолдириши”ни истамаяпти.
Мудофаа компанияси раҳбарларидан бири Буюк Британияни “навбатнинг олди қаторига қўйиш” учун кураш кетаётганини айтган. Бу Риши Сунакнинг Украинага қирувчи самолётлар етказиб бериш учун “эшикни очиб берган”идан сўнг юз бермоқда. Ҳукумат ва мудофаа вазирлиги бу хабарга ҳеч қандай изоҳ бермаган.
Буюк Британия Киевга оғир танк етказиб беришга рози бўлган илк давлат ҳисобланади.
