The Guardian: Эрон Россияга кучлироқ дронлар етказиб берган
Бу бўйича келишув ўтган йилнинг ноябрида имзоланган.
2022 йил ноябрида Эрон Россияга навбатдаги партия дронларини етказиб берган. Улар катта радиусли қурилмалар ҳисобланади. Бу ҳақда The Guardian нашри ўз манбаларига таяниб хабар берди.
Нашр маълумотларига кўра, Москва ва Теҳрон ноябрда янги келишувга эришган. Ўша пайтда Россия делегацияси 6 дона Mohajer-6 дронлари ҳамда 12 та Shahed 191 ва 129учувчисиз қурилмаларини етказиб беришни сўраган. Бундан аввал Эрон етказиб берган камикадзе-дронлардан фарқли ўлароқ ушбу қурилмалардан кўп марта фойдаланиш мумкин — улар зарбалар бергандан кейин базага қайтиши мумкин.
Газета Россия мукаммалроқ учувчисиз қурилмаларга эҳтиёж сезаётганини қайд этган. Чунки Украина томони Shahed-131 ва Shahed-136 қурилмаларини уриб туширишда катта тажриба тўплаган.
The Guardian манбаларидан бири дронлар РФга икки йўналиш орқали келганини айтган. Уларнинг бир қисми Россия ҳарбий-денгиз кучларининг Каспий денгизи кемаларида ташилган бўлса, қолган қисмини Эрон давлат авиакомпанияси олиб келган. Шу билан бирга 54 инструктордан иборат эронликлар гуруҳи ҳам юборилган бўлиши эҳтимоли бор.
Жўнатилган дронлар Исфахондаги заводда ишлаб чиқарилган бўлиши мумкин. Бу заводда январь охирида портлашлар юз берганди. Бу эса ўз навбатида Россияга учувчисиз қурилмалар етказиб бериш масаласини сўроқ остига қўяди, чунки корхона ҳаво ҳужуми оқибатида катта зарар кўрган бўлиши мумкин.
Москва Украинада Эрон дронларидан фаол фойдаланиб келмоқда. 2022 йил кузида The Washington Post Россия ўз ҳудудида бу қурилмаларни ишлаб чиқаришни бошлаши мумкинлигини ёзганди.
