Тошкентда номаълум шахс болани мактабдан судраб олиб кетмоқчи бўлгани айтилди
Ҳолатга шаҳар ИИББ изоҳ берди.
Ижтимоий тармоқда Тошкент шаҳрининг Яшнобод туманида эркак киши ёш болани қўлидан ушлаб тортганлиги ва бола ундан қочиб кетганлиги акс этган видео тарқалиб, турли муҳокамаларга сабаб бўлмоқда. Ҳолат юзасидан шаҳар ИИББ маълумот берди.
Ҳодиса бугун, 19 февраль куни соат 12:35 ларда Яшнобод тумани Авиасозлар-2 даҳасидаги 151-сонли умумий ўрта таълим мактабида юз берган. Номаълум шахс шу мактаб ўқувчиси — 2011 йилда туғилган М.о.ни тўхтатиб, қўлидан ушлаб “Шу мактабда таҳсил оласанми?” деб сўраган. Вояга етмаган М.о. ушбу шахсни танимаганлиги сабабли у билан гаплашмаслигини билдириб, қўйиб юборишини айтган, сўнг уйига кетган.
Бола ҳозирда ота-онасининг ёнида соғ-саломат ҳолатда. Ҳолат юзасидан Яшнобод тумани ИИО ФМБ томонидан терговга қадар текширув ўтказилмоқда. Ўрганишлар жараёнида видеода акс этган шахс 1994 йилда туғилган М.У. эканлиги аниқланган.
“Текширув якуни бўйича қонуний қарор қабул қилиниши таъминланади”, — дейилади хабарда.
